Салдатамі становяцца

размещено в: Наши новости | 0

Восень – пара чарговага прызыву на тэрміновую службу. У гэтыя лістападаўскія дні 33 нашых юных землякі адправяцца ў розныя вайсковыя часці і падраздзяленні Узброеных Сіл Рэспублікі Беларусь. Абарона рубяжоў Айчыны ў імя захавання міру і спакою грамадзян – пачэсны абавязак кожнага сапраўднага мужчыны. Менавіта армія – тая школа мужнасці, стойкасці, вынослівасці для нядаўніх выпускнікоў школ, прафтэхвучылішчаў і каледжаў. У нашым раёне ўжо стала добрай традыцыяй урачыста праводзіць на тэрміновую службу землякоў. Месцам правядзення гэтага мерапрыемства нездарма стаў раённы краязнаўчы музей. Тут сабрана і захоўваецца вялікая колькасць экспанатаў, якія ўтрымліваюць звесткі аб трагічным мінулым нашага краю, подзвігу воінаў, партызан, падпольшчыкаў, якія ў гады ваеннага ліхалецця цаной свайго жыцця і здароўя адстаялі наша светлае будучае. Працягваць лепшыя ваенныя традыцыі продкаў, быць іх дастойнымі пераемнікамі – такі наказ далі навабранцам ветэраны Вялікай Айчыннай вайны на чале з В. М. Сазонавым, старшынёй раённай ветэранскай арганізацыі. Самы хвалюючы момант для прызыўнікоў – атрыманне павестак на службу. Іх, а таксама падарункі ад РК ГА БРСМ, будучым вайскоўцам уручылі А. У. Шакола, ваенны камісар раёна, і Юлія Комар, першы сакратар РК ГА БРСМ. «Воинство наше всегда служило защите Отечества, ратным подвигом его вы по праву можете гордиться. Армия – это школа мужания, трудная, но необходимая, поэтому несите её тяготы вместе», – адзначыў, звяртаючыся да прызыўнікоў, настаяцель Свята-Благавешчанскага храма пратаіерэй Сергій. Ён дабраславіў навабранцаў, акрапіў святой вадой, падараваў кожнаму іконку, пажадаў духоўнай і фізічнай моцы і хуткага вяртання дадому. Добрым падарункам прызыўнікам сталі песні ў выкананні Аляксандра Верамеева, Ірыны Вароніч, Аляксандра Чыхунова. У завяршэнні – экскурсія па залах музея і фотаздымак на памяць аб гэтай знакавай у жыцці падзеі. Калі я фатаграфавала навабранцаў, на памяць прыйшлі словы: «Солдатами не рождаются, солдатами становятся». Сапраўды, становяцца, назапашваючы веды і навыкі, умацоўваючы волю, пераадольваючы цяжкасці і выпрабаванні. Глядзела на гэтых юных абаронцаў Айчыны, а ўнутры нешта падказвала, што стануць яны сапраўднымі салдатамі.

Алена ГАНЧАРОВА.

Оставить ответ

:wink: :twisted: :roll: :oops: :mrgreen: :lol: :idea: :evil: :cry: :arrow: :?: :-| :-x :-o :-P :-D :-? :) :( :!: 8-O 8)