САКАВІТАЯ ТРАЎКА – МАЛАКА ПРЫБАЎКА

размещено в: Наши новости | 0

Сярэдзіна  чэрвеня.  Наша  рэдакцыйная  машына  бярэ  кірунак  на  ферму  “Малінавае”  філіяла  “Клічаўскі”   ААТ  “КЛІЧАЎРАПТЗ”.  Тут  утрымліваецца  572  галавы  буйной  рагатай  жывёлы,   у  тым  ліку  105 – дойны  статак.  Ужо  з’явілася  на  свет  124  цяляці.
Ноччу  прайшоў  дождж  і  вымыў  наваколле.  На  азіміне  наліваецца  калоссе.  Роўнымі  радкамі  ўзнімаюцца  кукурузныя  палі.  Гладка  выкашаныя  сенажаці,  напоеныя  доўгачаканай  вільгаццю,  у  хуткім  часе  зазелянеюць  свежай  атавай.
Працоўны  дзень  у  даяркі  Святланы  Іванаўны  ЯБЛОНСКАЙ  пачынаецца  на  досвітку.  У  5  гадзін 30 хвілін  яна  ўжо  на  ферме.  Перш  наперш  правярае,  як  пераначавалі,  як  адчуваюць  сябе  маленькія  цяляткі.  Хуценька  напоіць  іх  малачком,  насыпле  ў  кармушкі  прысмакаў.  Як  адзначае  галоўны  ветурач  гаспадаркі,  захаванасць  прыплоду  ў  яе  групе  100  працэнтаў.   Потым  пагладзіць  і  падба-дзёрыць  цельных  каровак,  і  нарэшце  прыступае  да  дойнага  статка.  З  68  “падапечных”  дояцца  60.  Асаблівая  ўвага  тым,  што  толькі  ацяліліся.  “Каб  карова  была  высокапрадукцыйнай,  вельмі  важна  своечасова  раздаіць  яе,  абавязкова  трэба  рабіць  масаж  вымя,  і  канешне ж,  жывёла  любіць  ласку,  – дзе-ліцца  сакрэтамі  вопытная  даярка. — Перш  чым  падключыць  апарат,  абавязкова  правяраю  яго,  і  калі  ёсць  нейкія  агрэхі  на  дапамогу  клічу  слесара  Віктара  Аляксандравіча  Кнігу.  Ён  таленавіты  ў  сваёй  справе  чалавек ”.
Акрамя  стандартнага  нумару  на  вуху  кожная  кароўка  мае  мянушку. Лялька,  Малютка,  Гном,  Пяструшка…  Аднавокую  карову  па  мянушцы  Гарэтніца  стараецца  прылашчыць  і  пачасаць  за  вухам,  пачаставаць  прадбачліва  прыпасенай скарынкай  ці  жменяй  сакавітай  травы.  А  тая  адгукаецца  на  ласку  і  добрыя  адносіны,  аддзячвае  гаспадыню добрым  удоем.  Рэкардсменка  ў  статку  Лыска  дае  ўвечары  аж  па  18  літраў  сырадою,  ды  яшчэ  13  у  ранні.    Суша,  нягледзячы  на  са-лідны  па  кароўскіх  мерках  узрост, а  ёй  ужо больш   за15  гадоў,  не  адстае  ад  Лыскі  і  выдае  за  два  ўдоі  25  літраў  малака.
Пасля  дойкі  каровы  адпраўляюцца  на  пашу,  а  аператары  машыннага  даення  мыюць  даільныя  апараты  і  малакаправод,  прыбіраюць  памяшканні  і  хлявы,  каб  увечары  зноў  пачаць  усё  з  пачатку.  І  так  з  дня  ў  дзень,  з  году  ў  год…

Аліна  СУДНІК.
На  здымку  адна
з  лепшых  даярак  гаспадаркі  Святлана  ЯБЛОНСКАЯ.
Фота  аўтара.

Оставить ответ

:wink: :twisted: :roll: :oops: :mrgreen: :lol: :idea: :evil: :cry: :arrow: :?: :-| :-x :-o :-P :-D :-? :) :( :!: 8-O 8)